સપનાનું ઘર – કેતા જોષી

દરેક સ્ત્રીની જેમ મારે પણ એક સપના નું ઘર છે. જેને હું ચણું, તોડું અને ફરી ચણું. મારા સપના ના પ્રદેશ માં વિહરું અને વળી ને વળી એમાં ફેરફાર કર્યા કરું. મારા સપના ના ઘરની આકૃતિ મારા પરિવાર ને લગભગ મોઢે થઇ ગઈ છે. એમાં જ્યારે હું ફેરફાર સૂચવું  ત્યારે તેઓ હસે છે. હકીકત અને સપનામાં ફેર છે. હકીકતમાં તો મારા ઘરના પરદા બદલવાનો નિર્ણય લેવો અને તેને અમલ માં મુકવો પણ અઘરો જણાય છે. રોજબરોજની ધાંધલ-ધમાલની દિનચર્યાના કારણે પસંદગીની  ખરીદી કરવા જવાનો સમય કાઢવો મુશ્કેલ થઇ જાય છે. બીજા અનેક નાના કામો પરદા બદલવા કરતા અનેકગણા જરૂરી હોય છે. તેથી તે કા ને અવગણીને હું ઘર અંગેની ખરીદી કરવા જઈ શક્તી નથી. આખરે એનો વારો ક્યાં તો દિવાળી આવે અને ક્યાં તો ઘરમાં કોઈ શુભ પ્રસંગ ની ઉજવણી કરવાની હોય ત્યારેજ  આવે.

પણ તેમ છતાં રજાના દિવસે સામી સાંજે એકાદ મનગમતું પુસ્તક લઈને વાંચવા બેઠી હોઉં ત્યારે આકાશમાં ઉભરાતા રંગોને માણવા પુસ્તક થોડીવાર બાજુએ મૂકી દઉં. મારા ઘરની બાલ્કની માંથી દેખાતો એટલો આકાશનો ટુકડો મારો ચીર પરિચિત સ્વજન જેવો લાગે છે. એને હું અને એ મને બરાબર પિછાણે છે. ડૂબતા સૂર્યની વેળાએ જયારે એની તરફ મીટ માંડું ત્યારે એને જાણે કેટલુંય કહેવું હોય. હું નજર ખસેડી જ ના શકું. મૌન દ્વારા પણ વાતચીત શક્ય છે. સૂર્ય ડૂબતો હોય ત્યારે એ આકાશનો ટુકડો જાણે ભાવભીની વિદાય લેતી દીકરીની જેમ ભાસે. જાણે કહેતો હોય, કાલે સવારે અધૂરી વાતો કરીશું. મને એ આકાશનો ટુકડો એટલો પોતીકો લાગે કે જ્યાં સુધી સૂર્ય ડૂબ્યા પછીનું અંધારું ઉતરી ના આવે ત્યાં સુધી ત્યાંથી ખસવાનું મન જ ના થાય.ક્યારેક ઢળતી સાંજે એટલા સુંદર રંગો ઢોળે કે મારે એની જોડે વાત કરવી જ પડે. હું એને મારા સપના ના ઘરની વાત કરું. એને કહું કે જ્યારે  મારુ એ ઘર બને ત્યારે ત્યાં પણ આવાજ  સુંદર રંગોની બિછાત લઈને આવજે.તને ખબર છે? મારું એ ઘર દરિયા કિનારે છે.

સ્વપનોની નીલરંગી પીંછી જ્યારે મેઘધનુષના રંગોમાં ઝબકોળાઈને એકાદ લસરકો કરે ત્યારે એક ઘર બને છે. તે લાગણીઓના તાણાવાણા થી વીંટળાયેલું છે.મોટી મોટી કાચની ફ્રેન્ચ વિન્ડોઝ. તેના પર લાગેલા આસમાની પરદા. એ પરદા હવાથી ઉડે ત્યારે હું એના પર  સવાર થઈને જાણે હવામાં ઊંડું.દીવાલો પર  સુંદર પેઈન્ટિંગ્સ. ઘરનો દરેક ઓરડો અને ખૂણો કાળજીથી શણગારેલો.ઓરડાના રાચરચીલા સાથે ભળે તેવા પરદા, ચાદર, રજાઇ અને ગલેફ. પલંગ ની બાજુમાં સાઈડ ટેબલ પર કલાત્મક નાનીશી ઘડિયાળ. નાનું ફ્લાવરપોટ. બીજી તરફના ટેબલ પર થોડા પુસ્તકો અને ચશ્મા. દરેક વસ્તુ યથાસ્થાને સ્વચ્છ અને સુઘડ રીતે ગોઠવાયેલી.

ઘરના ડ્રોઈંગરૂમ ને અને રસોડાને જોડતો કોરિડોર. તેમાં પણ દીવાલમાંજ બનાવેલો નાનકડો શોકેસ. તેની ઉપર ઝીણી પણ અંધારામાં ઝળકી ઉઠતી લાઈટ. ઓપન કિચનનો મહિમા એટલો ગવાયેલો કે મારા મનમાં ઠસી જ ગયેલું કે મારા ઘરમાં ઓપન કિચન જ હોવું જોઈએ.રસોડામાં વપરાતી દરેક ચીજવસ્તુ ત્રણ તરફની દીવાલ ફરતેના પ્લેટફોર્મ પર કે તેની નીચેના ખાનાઓમાં જ સમાઇ જાય. જમણી તરફના ખૂણા પાસે ના દરવાજામાંથી પાછળથી દરિયા તરફ જવાના રસ્તા પર જઈ શકાય. પાછળના દરિયા તરફ જવાના રસ્તા પાસે નાનો કાળા ખડકોમાંથી બનાવાયેલો હોય તેવો પોર્ચ. ફરતે બેઠક અને એકસરખા અંતરે છત અને બેઠક ને જોડતા થાંભલા. છત પરના ગુંબજના આકારના કારણે મંદિરના પરિસર જેવો ઓપ ઉઠતો. વરસતા વરસાદમાં એ પોર્ચમાં બેસીને દરિયો નિહાળવા જેવો આનંદ બીજો કોઈ નથી. ઉગતા સૂર્યના તડકામાં રેતકણો  હીરાની જેમ ચમકી ઉઠે. સમુદ્રની વિરાટ સિતાર બસ બજયાંજ કરે.

મારા મનમાં ચાલતા વિચારો મારા પતિ તરત જાણી જાય.એટલે ચપટી વગાડીને મને સ્વપ્ન પ્રદેશમાંથી વાસ્તવિક દુનિયામાં લઇ આવે. કહે,” ઘરની ડિઝાઇન માં નિરાંતે ફેરફાર કરજે. અત્યારે તો બંદાને ભૂખ લાગી છે એટલે આપણા નાનકડા કિચન માં પધારો.”

મનમાં આવતા વિકએન્ડમાં ઘર માટે શું ખરીદી કરવી અને ક્યાંથી કરવી એનો પ્રોગ્રામ ઘડતાં ઘડતા મારા હાથ રસોઈ બનાવવામાં લાગી જતા.

-કેતા જોષી

Advertisements

One thought on “સપનાનું ઘર – કેતા જોષી

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s